Թալին Միկրոյանի հեղինակային խճանկարների ցուցահանդես ՆԱՄ-ում
2026-11-09 18:30 | Naregatsi Art Institute
Բացվել է Թալին Միկրոյանի խճանկարների ցուցահանդեսը
Նոյեմբերի 9-ին «Նարեկացի» արվեստի միության ցուցասրահում բացվեց սիրիահայ արվեստագետ Թալին Միկրոյանի «Խոսող քարեր» հեղինակային խճանկարների անհատական ցուցահանդեսը։
Միջոցառումը մեկնարկեց ՆԱՄ ցուցահանդեսների համադրող, արվեստաբան Տաթևիկ Համբարձումյանի բացման խոսքով։ Նա ընդգծեց, որ ներկաները դառնում են ականատեսը նրա, թե ինչպես է բնական քարը արվեստագետի ձեռքերում վերածվում ազգային, բայց միևնույն ժամանակ ժամանակակից շնչով հագեցած խճանկարների։ Դրանք ուրույն երկխոսություն են հանդիսատեսի և մեր պատմամշակութային հիշողության միջև։
Ծնունդով հալեպահայ Թալին Միկրոյանի կապն արվեստի հետ սկսվել է դեռ վաղ հասակից։ Չնայած ստացած գյուղատնտեսական մասնագիտությանը՝ նա չի հեռացել ստեղծագործական ուղուց․ բնության հանդեպ ունեցած խոր զգացողությունն ու մասնագիտական գիտելիքները միահյուսվել են արվեստին՝ արտացոլվելով բնական քարերի միջոցով։
Խճանկարչության մեջ իր հմտությունները կատարելագործելու նպատակով հեղինակը մասնակցել է մասնագիտական դասընթացների, իսկ աշխատանքները ցուցադրել է Սիրիայի, Լիբանանի և Վրաստանի ցուցասրահներում։ Նրա վարպետությունը նկատվել ու բարձր է գնահատվել նաև մասնագիտական շրջանակներում, ինչի վառ ապացույցն է 2023 թվականին ստացած Խայր ալ-Դին Ալասատի մրցանակը։
2025 թվականից սկսած՝ Թալին Միկրոյանը տեղափոխվել է Հայաստան, որտեղ շարունակում է իր ակտիվ ստեղծագործական գործունեությունը՝ ուրույն ձեռագիր և նոր շունչ բերելով հայկական խճանկարային արվեստին։
Թալին Միկրոյանն իր երախտագիտությունը հայտնեց «Նարեկացի» արվեստի միությանն ու ներկաներին՝ ջերմ ընդունելության, աջակցության և իր ստեղծագործություններով հետաքրքրվելու համար։
Ցուցահանդեսը «Նարեկացի» արվեստի միությունում բաց է լինելու մինչև նոյեմբերի 13-ը։ Արվեստասերները հնարավորություն ունեն այցելելու և անձամբ հաղորդակից դառնալու «խոսող քարերի» խորհրդավոր աշխարհին։
Աջակցեք Մշակույթին
Նարեկացի Արվեստի Ինստիտուտը ԱՄՆ-ում գրանցված ոչ առևտրային կազմակերպություն է (501(c)(3))՝ գլխամասային գրասենյակներով Երևանում և Շուշիում։